Biertnasáiti Henrik Larsen (1839-1917) maŋen lea viimmat máhccán siidii

Govva nr. 1: Roald larsen ja Liss Larsen iskaba máttarádjá Heaika Larsena bierdnasáiti. Govvejeaddji: Thomas Ole Andersen

Bierdnasáiti Henrik Larsena maŋen Hoanttasa eret lea viimmat máhccán siidii guhkes reaisu maŋŋel.

Muitalusat biertnabivddiid Heaika ja Lasse Larsena (vieljat) sáitti birra leat liikká eallán maŋisboahttiid gaskan. Lea viehka dehálaš ahte bierdnasáiti dál lea Várdobáiki musea hálddus maŋisboahttiid bealis ja sámi servodaga bealis. Lei dobduičuohcci dáhpáhus go Heaika Larsena maŋisboahttit bohte sáitti ealvvažit. Maŋimus geardde go Roald Larsen, bártnibárdni Heaika Larsenii, doalai sáitti lei su mánnávuođabáikkis Hoanttasin. Son muitalii ahte lea badjel 40 jagi geahččalan gávdnat sáitti, ja dal viimmat lea sáiti boahtán siidii. Mii giitiit Oarje-Romssa musea bargiide geahkas leat veahkehan ja oaidnán man dehalaččan lea go bierdnasáiti vuosehuvvo Várdobáikkis.

 

Maŋisboahttit geahkas ledje sajis: Roald Larsen ja Liss Larsen (Heaika Larsena bártnibárdni ja nieiddanieida), Kine Larsen ja Ann Jørgun Larsen (Heaika Larsena máttaráddjut), ja Mikkel Isak Sara (náitalan stuoravehkii). 

 

Bierdnasáiti sáhttá geahččat Várdobáiki museas Siidii vuosehusas

Govva nr. 2. Roald Larsen beasai viimmat doallat sáitti máŋggaid logijagiid maŋŋel. Govvejeaddji: Thomas Olse Andersen

 

Veahá histtorjá

Vieljat Heaika ja Lasse Larsen oruiga Hoanttasin, gos soai bivddiiga biertna ja dasa lassin barggaiga dálohoaidduin, boazodoaluin, guolástusain ja meahccebargguiguin. Meahcis vieččaiga smáviid eallebiid nugo njoammiliid, rebehiid ja lottiid. Muhto vieljat heaika ja Lasse leigga heanemus dovddusin leahkit buorit biertnabivdit. Muitaluvvo ahte dát guovttos godde badjel 50 biertna i aktibuot áiggistis. Márkogilážiid ja mearragáttiid ránnját láigohe dáid guoktása biertnabivdin. Boanddat ja iežá ealáhusdoallit mákse nu gohčoduvvon eaktodáhtolaš "biertnavearu" oččožit Heaika ja Lasse vuohcit biertnaid mat áitet guovllu lihtariid. Vieljažat ožžo nai guhtege Remington-bissu Gonagas Oscar II:s, dienádussan iežaset bivdduid ovddas. Ovdal go bissu šattai bivdovearjun, de vieljažat ruhkoje dán sáitti bivdui.